Wat is toveel? (plattdeutsch)
Hein Achterdiek vertellt
Corona is al wat Besünners. Mien Fru un ik höört je to de "Risikogruppe" to un gaht meist blots to'n Inköpen to uns Koopmann nevenan. Un ok mal spazeern, man sünst... Wi vertrieven uns anners de Tiet, mien Fru meist mit Handarbeiden. Dat gifft keen Bekannte, Kinner und Nawers mehr, de nich 'nen Dook, Pottlappen oder Strümp kregen hett. Se arbeitet sachs im Akkord. Mit Dökern, Pullover und Kleeder kann se intwischen meist hanneln - tominnst ist dat Klederschapp vull worrn, man noch hett se meist keen Gelegenheit, dat uttoföhrn. Nun see se, se mutt niee Wull hebben. Darbi gifft dat nargens 'n Stuuv in't Hus, wor mi keen geele, rode or gröne Gaarn anfallt.
"Dat versteihst du nich", seggt se denn. Jede Wull seggt ehr, wat se warrn will un dat is nich immer dat, wat se jüst stricken or häkeln will. Un de Farv mutt ja ok passen, un vun de een gifft dat nich 'nog, vun de annere passt de Farv nicht to de annere or een is to dick un de annere to dünn - un al dorüm geiht da nich jümmers tohoop. "Wenn ik di nu wat stricken will... Wat weer dien Farv?" "Blau", verplapper ik mi op'n Stutz. "Sühste, vun Blau heff ik överhaupt nix mehr". "Dat mookt nix", segg ik gau, "ik will jo ok nix". "Man wenn du een niee Jack bruken wöörst, denn harr ik nich de richtige Wull. Ik mutt mi gau wat bestellen... Man weet ja nich, wolang düsse Corona noch duert."
Ik heff da lever nix to seggt. Op düsse Rebeet kannst mit mien Fru nich diskuteern.